Wednesday, 10th January, 2018

Mizoram-ah a vawikhatna atan zirna In thlanbik ah Zero Waste Management kalpui a ni dawn

Mizoram-ah a vawikhatna atan Zero Waste Management kalpui a ni dawn ta a, New Economic Development Policy (NEDP) hnuaiah he hnathawhna tur cheng nuai 15 hu Work Order chu nimin khan UD&PA Minister, Zodintluanga chuan a semchhuak a ni. Zero Waste Management kalpuina tura Work Order hi UD&PA Minister, Zodintluanga chuan Pachhunga University College (PUC), Aizawl Theological College (ATC), Academy of Integrated Christian Studies (AICS) leh Higher and Technical Institute of Mizoram (HATIM) hotute hnenah hlanin hemi puala inkhawm a Office-a neih ah UD&PA Minister chuan Zero Waste Management-in a tum chu hmanraw hlui tiriral lova hman nawn (Recycling), Bawlhhlawh paih dan (Waste disposal) leh bawlhhlawh sawngbawl dan (Waste Management) te a ni a. Zero Waste Concept chu Mizote tan chuan thil thar ni mah se khawiah emaw bul \an a ngai si a. Heng institute-te hi campus \ha tak nei, hmun danga bawlhhlawh paih lova anmahni ramchhung \heuhah an bawlhhlawh tih riralna tur bawlhhlawh sawngbawlna siam tura beisei an ni a, he project hi tute emaw inhlawhna tur ni lovin anmahni ta anih angin anmahni ngeiin a siam hna leh buaipui hna zawng zawng an thawk dawn a ni, a ti.
Zero Waste project hnuaiah hian Green Waste an siam chhuah zawng zawng composting hmanga lei\ha siam chhuah a, Recycle theihte recycle a, hman nawn theih loh (inert materials) te fel takin an phum bo dawn tih UD&PA Minister chuan sawiin, “India ram khawpui Delhi colony pakhat, New Moti Bagh-ah chuan kum 2017 at\ng khan Zero Waste Management Project kalpui \an turin a inruahman a. He Zero Waste Management Project hnuaiah hian he colony chhûnga bawlhhlawh zawng zawng chu an colony pel lovin an chingfel dawn a ni,” tih a sawi a, Mizoram-ah pawh a bul \an nan kan zirna In (institute) chhuanawm tak takte phungbawmah sawmin anni hian Mizoram mipuite tan entawn tur \ha tak an siam theih ngei sawrkar chuan a beisei hle a ni, a ti. He hunah hian UD&PA Secretary, Dr. C. Vanlalramsanga pawhin thu sawiin khawvel \hang chho zelah mihringten kan mamawh (consumer products) kan siamchhuahna lamah hnawk leh bawlhhlawh tam tak a siam tak avangin kan nunphung leh khawsak phung pawh nasa takin a tibuai a. Mihring ten kan mamawh kan titlem thiam silo leh thil siamchhuaktu ten an thilsiam te hralhchhuahna tur (outlet) an zawn mawlh mawlh lai hian chung thilsiam, mipui nawlpuiin kan lei te chuan kâwr leh bâwm te neiin hmanruah leh hman zawh an nih tawh hnuah chuan a tih riralna tur ngaihtuah chu hna hautak tak mai a nih thu a sawi a. Ram changkang zawkah chuan hetiang harsatna chinfel nan hian Zero Waste Management hi kalpuiin, hei hian a tum ber chu bawlhhlawh a lo tlem nan thil (consumer products) hman tlem leh, kan hman chhunte pawh pawn lama paih chhuak lo a, kan hmanna hmuna tihriral dan neih te a nih thu a sawi bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/10/2018 - 10:10

Mizoram-a UN Joint Initiative Project a tawp hnuah UN Programme Coordination Office chu NIB kutah hlan a ni

UN Joint Initiative Project (2014-2017) hun a lo tawp tak avangin Aizawl-a UN Programme Coordination Office enkawl chhunzawm hna NLUP Implementing Board kutah nimin khan hlan a ni a, ruahmanna thar a awm hma chuan UN Programme Coordination Office hi NLUP Implementing Board in lo enkawl rih dawn a ni.
Aizawl-a NLUP Implementing Board (NIB) Conference Hall-a UN Programme Coordination Office enkawl chhunzawm hna NLUP Implementing Board kuta hlan inkhawm ah hian NIB Chairman, JH. Ro\huama chuan NLUP Implementing Board kuta UN Programme Coordination Office hlanchhawn ani chu UNO leh Mizoram Sawrkar thawhhona bung khatna kharna a ni tih sawiin, Bung hnihna keu leh thuai anih dawn thu leh kawng hrang hranga thawhho chhunzawm zel anih tur thu a sawi a, UN Agency ten Mizoram an rawn zawnchhuahna leh Mizoram sawrkar hotute \an lakna ropui a tih thu sawiin, kum thum chhungin UN Joint Initiative Project a\angin thil tha tam tak zirchhuah anih thu a sawi bawk. NLUP Implementing Board Vice-Chairman, PL Thanga pawhin UN Joint Initiative Project lo pianchhuah dan leh Mizoram-a an rawn luh dan chipchiar sawiin, “Tunah hian Bung khatna zawhfel ni ta in; Bung hnihna ah kan lut dawn a, he hun kan thlen theihna tur hian Mizoram Sawrkar hotute leh Line Department hrang hrang te an thawkrim em em a, an thawhrim rah a \ha zawngin Mizoramin a tel \an mek a ni,” a ti a, Mizorama an rawn thawh tak tak hma in UN Agency hrang hrang hotuten ruahmanna \ha tak an siam a, vawi duailo Mizoram rawn tlawhin a hmunah thil awmdan dik tak an rawn zirchiang hmasa a, hemi behchhana hma an lak avangin an hmalakna te hian belhchian a dawl hle a ni, a ti bawk. He hunah hian United Nations aiawha UNDP Coordinator, Rinzuala chuan UN Agency pali- UNDP, FAO, ILO leh UNIDO ten an hunbi tiam ang tluang taka hmang zova Mizo-ram-a hma an la thei chu thil lawmawm leh chhinchhiahtlak a ni, a ti a, NLUP Implementing Board te nen an thawhhona \hat vanga tluang taka hma an lak theih avangin lawmthu a sawi a, Mizoram-a UNO an rawn lut chu thil lawmawm leh pawimawh tak a ni a, Project leh tangka an rawn luhpui chu pawimawh viau mahse UNO darthlalang a Mizoram an tel ve ta chu a lawmawm lai ber a ni zawk a, tun bakah hian project lian zawk kalpui tura \an lak mek a ni a, Mizoram tan hmasawnna leh hlawkna nasa zawk UNO kaltlangin a rawn luh zel a beisei thu a sawi bawk. Mizoram Sawrkar leh United Nations Organisations peng pali te thawhhona thuthlung hi October ni 16, 2014 khan ziah niin he thawh-hona hi kum thum (2014 – 2017) chhung atana ruahman a ni a, UN Organisation pali - United Nations Development Programme (UNDP), Food & Agriculture Organisation (FAO), United Nations Industrial Development Orga-nisation (UNIDO) leh United Nations International Labour Organisation (ILO) te an tel a ni. He Project in a tum bulpui ber chu Food Security, Livelihood Security, Energy and Environment Security, Ecological Balance, Sustainable Livelihood, Income Generation leh Ecosystem venhimna atan Mau hman \angkai, Agriculture leh a kaihhnawih hman \angkai leh Market linkage te an ni a, ruahman anga tluang taka he project hi kalpui niin UN Agency te hian Mizoram hmasawnna atana ruahmanna an siam leh hmathlir an neih te Mizoram Sawrkar bawhzui tura an thehluh hnuah December ni 31, 2017 khan he project hi tihtawp a ni ta a ni. Nimin a UN Programme Coordination Office inhlanchhawnna lehkha-ah hian United Nations aiawhin Rinzuala, Coordinator, UNDP in a hming a ziak a, NLUP Implementing Board aiawhin James Lalrinchhana, Secretary chuan hming a ziak a. Office enkawl chhunzawm zel dan tur chu Chief Minister hova rel leh tur a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/10/2018 - 10:10

Tuesday, 9th January, 2018

Kumin a inthlanpui neih tur a hun hmaa kan neih a ngai mai thei - Lal Thanhawla

Mizoram Pradesh Congress Committee (MPCC) President, Lal Thanhawla chuan kumin hi inthlan kum a nih thu leh Sorkar laipui-a thuneitu BJP chuan an chak vanglai tak nia an hriat avangin inthlanpui neih tur chu a hun hmaa neih a ngaih mai theih thu a sawi. 
Mizoram Pradesh Congress Committee (MPCC) chuan Aizawl-a an Office, Congress Bhavan chu kumthar 2018 atana hawnna nimin khan neiin he hunah hian MPCC President, Lal Thanhawla chuan he thu hi a sawi a. He hunah hian Chief Minister ni bawk, Lal Thanhawla chuan Mizoram-a BJP hruaituten inthlanpui neih tur atan nasa taka \an an lak mek thu leh an \anlak dan chu Central lama an hotuten an hriatpui vak lo nia a lan thu sawiin, nikum kumtawp lama President, Ram Nath Kovin-a'n Mizoram a lo tlawh \uma Assembly Special Session neihpui a nih khan thu a sawina ah Mizo mipuite chunga a lawmthu leh Assembly Session kalphung \ha tak an neih avanga a lawmthu leh remna leh muanna a fak thu a sawi uar hle a. Hetiang bawk hian Prime Minister, Narendra Modi-a'n nikum December thlaa Mizoram a lo tlawh khan Mizoram sorkar beihna emaw, duh khawplohna emaw pakhatmah a sawi lang lo niin a sawi bawk. Chief Minister chuan, Mizoram-a Term 5 Sorkar thei awmchhun chu Congress party chiah ala nih thu leh kumina inthlanpui lo awm leh turah pawh an hotute kaihhruaina hnuaiah thuneihna an chan chhunzawm leh a beisei thu te, Mizoram chu Pathian in chanchin\ha hril tura a tih angin Pathian duh zawnga ram kaihruai tur leh miharsa zawkte dinhmun khaichhuak tura thuneihna an chan chhunzawm a ngaih thu a sawi bawk. Congress Bhavan hawnna hun hi MPCC Treasurer, H. Liansailova chuan kaihruaiin Rev. Lalbiakvulmawia chuan Hunserh hmangin Ram roreltute chu Pathian tan nasa taka thawktute an nih thu a sawi a, “Ram tana rawngbawltute hian mi \hatlohna sawi loh a \ha, mi ram leh state dang kan ngaihtuah chuan kan ram politics hi chu a la thianghlim hle in, Pathian malsawmna kan la dawng a ni a tih theih awm e,” a ti bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Tue, 01/09/2018 - 09:08

YMA Office hawn \an a ni

Nimin a\ang khan Central YMA Office leh Central YMA hnuaia Sub-Hqrs. YMA Office te chu kumin atan hawn \an a ni leh ta a, Serchhip Sub-Hqrs. YMA Office pawh hawn \an a ni leh ta bawk. Nimin a Central YMA Office hawnna hun hi Central YMA President, Vanlalruata chuan a kaihruai a, he hunah hian Central YMA President chuan Central YMA Staff te inpekna leh thawhrimna fakawm a tih thu sawiin, inleng lo dawnsawn danah pawh Office dang ang lo taka YMA Office a nih ang ngeia hawihhawm taka lo dawnsawn a nih \hin avangin lawmawm a tih thu leh kumthar anih angin tun aia inpekna nasa leh zuala \anla turin Staff-te a fuih bawk. Central YMA Office hawnna inkhawm ah hian Central YMA Treasurer, Lal-rochuanga Pachuau chuan Pathian hnena \awng-\aiin inhlanna a nei a, Central YMA OB te bakah CEC engemawzatin an telpui bawk a ni.
Central YMA Office bakah hian Sub-Hqrs. YMA Office hrang hrang- Lunglei, Cham-phai, Kolasib, Serchhip leh Mamit te pawh nimin a\ang khan hawn \an a ni leh ta bawk a, Ser-chhip Sub-Hqrs. YMA Office pawh nimin khan hawn niin mipui, a duh apiangte tan dawr theih a ni a, YMA bungrua an zawrh chi hrang hrangte pawh lei theih a ni leh tawh bawk a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Tue, 01/09/2018 - 09:07

Block Level Banker's Committee \hutkhawm neih a ni

Mizoram-a Block Level Banker's Committee (BLBC) meeting neih hmasak ber ni turin nimin khan East Lungdar Block Level Bankers Committee meeting chu an Chairman, Vanlal-\anpuia, MCS BDO, E. Lungdar hovin a Office ah neih a ni. East Lungdar Block Level Bankers Committee Meeting-ah hian Bank leh Sawrkar Development Programme hrang hrang te mipui ten hlawk zawka an chhawr dan turte, harsatna awm mek hmachhawn a sutkian ho dan tur te leh thingtlang khaw hrang hranga Financial Literacy Campaign neih dan turte an rel bakah a bik takin MzSRLM, MGNREGA, PMAY, PMEGP chungchangah te hlawk zawka hmalak dan tur chipchiar takin an sawiho a ni.
He Meeting-ah hian Ralkhuma, Chief Manager, Lead Bank, SBI, Mizoram, Henry L. Hrahsel, Director, SBI-RSETI, Manager, Mizoram Rural Bank, E.Lungdar, N.Vanlaiphai leh Khaw-lailung bakah VCP, E.Lungdar, N.Vanlaiphai, Khawlailung leh Leng khua te leh E.Lungdar RD Block Office a thawktute an tel a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Tue, 01/09/2018 - 09:06

Naupiang 355 leh mitthi 52

Nikum (2017) chhung khan JN Hospital Ser-chhip-ah naupiang 355 awmin mitthi 52 an awm. District Medical Superintendent (DMS) Serchhip Office a\anga thu kan dawn danin nikum chhung khan JN Hospital OPD-ah inentir \ha-hnem tak awmin General-ah mi 23,752; Ayush OPD-ah 2864; Dental OPD-ah 5242, Eye OPD-ah 4820 leh Emergency Casualty-ah mi 5789 an awm a. Damdawi In-a admit damlo 2725 awmin mitthi 52 an awm a, hmundanga enkawl tura reffer 95 awmin naupiang 355 an awm a ni. Nikum chhung khan Serchhip damdawi In ah hian zaipui (Major Operation) \um 90 zet a awm bakah zai tenau (Minor Operation) 2181 an awm bawk a ni. Nikum hmasa (2016) khan Serchhip damdawi In-ah hian naupiang 334 awmin mitthi 54 an awm a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Tue, 01/09/2018 - 09:06

Serchhip-a END ten nikum-ah Chhiah vbc. 3 chuang hmuin nikum hmasa aiin Chhiah an hmu tlem zawk

Serchhip-a Excise & Narcotics Department chuan nikum (2017) chhung khan Zu leh a kaihhnawih ruihtheih thil chi hrang hrang \hahnem tak manin sawrkar-ah Chhiah Rs. 3,99,11,053/- zet an chhunglut a. Sawrkar a Chhiah an chhunluh hi nikum hmasa aiin nasa takin a tlahniam a ni. Serchhip-a Excise & Narcotics Department Office a\anga thu kan dawn danin Serchhip-a Excise & Narcotics Department hian nikum chhung khan Foreign Liquor & Spirit a\angin Chhiah Rs. 3,95,33,013/- hmuin Chhiah dang Rs. 3,78,040/- an hmu a, Foreign Liquor & Spirit hi MLPC Act hnuaia Zu dawr hrang hrang a\anga Chhiah an hmuh an ni tlangpui a ni. Serchhip-a Excise & Narcotics Department te hian nikum chhung khan tualchhung siam zu litre 761.895 zet manin hei hi Rs. 1,01,600/- hu zet a ni a, Zu bilhlai |in 128 manin Sapzu Um puitling 37, Rs. 8880/- hu te, Um chanve 64, Rs. 9600/- hu leh Beer (Ml 500) Can 52, Rs. 3640/- hi an man a, Zu siamna hmanrua Bel 9, Rs. 7200/- hu manin lirthei pakhat, LMV an man bawk a. Mizoram-a Zu khauhkhirhna Dan, MLPC Act hnuaiah thubuai 90 ziaklutin mi 90 an man bawk. Heng bakah hian nikum chhung khan Heroin pawh gram 3 an man a, hei hi Rs. 10,000/- hu a ni a, ND&PS Act hnuaiah thubuai 2 ziahluh niin mi 2 man an nei bawk a ni.
Serchhip-a Excise & Narcotics Department hian nikum hmasa (2016) khan Rakzu litre 144.525 manin Zu bilh lai |in 65 an man a, dawidim Kg. 3.008 manin Spazu um puitling 72, A chanve um 6 leh Beer cane 6 an lo man tawh bawk a, nikum hmasa lama an man aiin nikum lama Zu leh a kaihhnawih chi hrang hrang an man hi nasa taka puangin Rakzu an man hi nikum hmasa aiin nikum khan Litre 617.37 zetin a pung a, zu bilhlai an man pawh |in 63 zeta pungin Sapzu um puitling an man erawh nikum khan a tlem zawk thung a, Foreign Liquor & Spirit a\anga sawrkar-a Chhiah an chhunluh erawh nikum chhung khan Rs. 1,01,92,152/- zetin a tlahniam thung a, nikum hmasa a sawrkar-a Chhiah an chhunluh zawng zawng chu Rs. 4,97,75,185/- a nih laiin nikum-a an Chhiah chhunluh Rs. 3,99,11,053/- hi Rs. 98,46,132/- in a tlem zawk bawk a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Tue, 01/09/2018 - 09:05

Monday, 11th December, 2017

Congress sawrkar in retheihna ah Zoram a hnuklut - K. Sang\huama, MLA

MNF MLA, K. Sang\huama chuan Congress party-in sawrkar na siamin, kum 25 chhung zet chu Zoram siam\hatna hun an neih thu leh siam\hat a hnehin retheihna ah a hnuklut niin a sawi. Mizo National Youth Front (MNYF) Headquarters in Inrinni kaltaa Sikulpuikawn, Melriat, Aibawk leh Sialsuk-a 'Sikpui Fehchhuah' campaign an buatsaih a hman-puina ah Sikulpuikawn-a hun an hmanna he thu hi sawiin K. Sang\huama chuan Vawiin-a kan rama harsatna tam tak lo awm chu rorelna dik lovin a hrin a ni tih sawiin, "MNF kan sawrkar chuan SEDP hmangin he retheihna khur ata mipuite chhanchhuah kan tum a ni," a ti a. MNF an sawrkar laiin Serlui B-ah megawatt 12 Hydel Project an siam thu leh chu chu hmang reng tho siin sawrkar chuan hawn pawh an hawng duhlo tih a sawi a. "Tuirial Hydel Project megawatt 60 kan tichhuak dawn an ti a, chutah chuan Mizoramin kan chan tur chu 12% a ni a, chu chu 7.5 mw vel chauh a ni a, chu chu to takin cheng 8.44 zelin kan lei dawn a ni a, sa\ahchhuak pek ang chauh a ni," a ti bawk.
MNYF ten Melriat-a hun hmannaah HC. Lalmalsawma Zasai, Mara Autonomous District Council-a MNF MDC ni lai chuan Pastor Chhawna'n ‘Chhim lam hi Mizoram kawtchhuah a ni dawn a ni’ a tih chu a thleng dik mek tih sawiin, chumi tur chuan chhim lam mipuite pawh an insingsa mek tih a sawi a. Mipuite leh sawrkar hnathawkte pawhin MNF sawrkar tur hi an sawi luai luai tawh nia sawiin, "Kan sawrkar hrawn mek hi sawrkar tlak an ni tawh lo a ni tih hi mite sawi dan a ni a, chhim lam hnaih zual Palak a\anga Lawngtlai thlengin MNF chuan kan rawn la dawn a ni," a ti bawk. Aibawk-a 'Sikpui Fehchhuah' campaign an buatsaih ah MNYF President, Er. Lalrinawma, MLA chuan MNF chu sawrkar turin an insingsa mek zel tih sawiin, an sawrkar loh chhunga engemaw avanga an party kalsante pawh haw tawh turin a ngen a. "In belh mek sawrkar hi a tlachhe mek a. Central lamah tluin India hmun hrang hrangah a rawn tlu chho zel a, Vawiin-ah Lailapur a rawn thleng tawh a ni," a ti a. "14th Finance Commission-in Panchayati Raj neilo te tana pawisa a dah tak loh avangin State Finance Commission hnenah ruahmanna siam turin a ti a, State Finance Commission-in VC te hnena pawisa an pek a beitham avangin khawtlang enkawltu VC te an khawngaihthlak hle a, MNF kan sawrkar chuan kan SEDP-in a tarlan angin VC te chu thuneihna sang zawk pek an ni dawn a ni," a ti bawk MNF |halaite hian tlai lamah Sialsuk-ah hun an hmang chhun-zawm leh bawk a, an hruaitu mi hrang hrangin thu an sawi a, he hunah hian MNYF Headquarters a\angin mi 70 vel an tel a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 12/11/2017 - 11:19

PRISM in ‘International Anti Corruption Day’ an hmang


“Corruption hi hma kan sawn theihlo chhan ber a ni” - President PRISM


PRISM Party chuan Inrinni khan Aizawl-a PRISM Conference Hall-ah ‘International Anti Corruption Day’ an hmang a, he hunah hian PRISM President, Vanlalruata chuan Corruption chu kan ramin hma a sawn theih loh chhan lian ber pakhat a nih thu a sawi.
PRISM buatsaiha International Anti Corruption Day puala inkhawm-ah hian PRISM President, Vanlalruata chuan Mizoram-ah ram hmasawnna hnathawh a chhiat em em a, a muan em em nachhan chu eirukna vang a ni tih sawiin, eirukna tibo tur hian PRISM chuan nasa taka hma an lo lak tawn \hin thu a sawi a. “PRISM Party kan sorkar hunah chuan Lokayukta, ha hriam tak nei kan nei ang a; ACB te, PWD Quality Control Division te leh Legal Metrology te tilianin kan thuamchak ang a; CBI te General consent pein kan ruai ang. Tuna ‘dehloh Sakei huai’ ang maia leng eiruk hmang Officer lian pui pui te, politician lawk tak tak te hi lung In-ah an tang dawn a, Chief Minister hlui an ni emaw, ni lo emaw, zuah an ni lovang,” a ti a. Khawvel ram dangah chuan an ram hruaitu lu ber hova International Anti Corruption Day hi urhsun taka hman \hin a nih thu sawiin, “Khawvel huap ni pawimawh dang ngaipawimawh em em \hin sawrkar hian eiruk dona ni erawh a ngaipawimawh lo hle a. Hei hi eng nge a chhan ka hre lo. Keini hian kumdangah pawh kan hman hram hram \hin avangin United Nation chuan, International Anti Corruption Day hmang thei ramah min ngaihphah \hin a ni,” a ti bawk. He huna PRISM General Secretary, Lalrinzual Chawngthu report a\anga a lan danin, PRISM dintirh 2006 a\anga he hun an hman thleng hian Social Audit \um 59, Monitoring & Evaluation \um 127, Suggestions pek 61, Complaints siam 51, FIRs thehluh 68, PILs thehluh 16 leh Booklet tihchhuah 24 an nei tawh a, heng a\ang hian mi 300 chu eiru ngeiah sawrkarin ngaiin, lung In tang 1; Ban 4 leh Suspend16 an awm tawh a, Dik lo-a compensation hmuh tum hmu lo mi 380, Chanai eiruksak peklet 107, Dik lo-a hnathawk tur lak ban 57, Dik loa pawisa kawl man cheng vbc. 500 aia tam leh public money kalral tur hum-him cheng vbc. 1950 vel a awm tawh bawk a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 12/11/2017 - 11:19

MZP in Zofate Chawlhbuk samfai hnatlang an nei

Mizo Zirlai Pawl (MZP) chuan Inrinni kalta khan CADC Area, Borapansury-a Zofate Chawlhbuk samfai hnatlang an nei. Zofate Chawlhbuk samfai hnatlang ah hian MZP General Hqrs. President, L. Ramdinliana Renthlei chuan min thlahtu kan pi leh puten thisen-a an leichhuah ram humhalh zui zel chu \hangtharte mawhphurhna a ni tih sawiin, \hangthar lokal zel tur ten kan pi leh pute lo sah zau sa ram, Chakma in an ta neih mek chu Chakma te ram emaw an la ti mai ang tih MZP in a hlauh avangin Zofate Chawlhbuk hi sak a nih thu a sawi a. "Keimahni ram chhung ngeiah dodalna leh harsatna tam tak paltlang chunga Chawlhbuk kan sa thei hram hi a lawmawm takzet a, hei hian kan ram leh hnam humhalh a \ulzia a tilang chiang hle a ni,"a ti bawk. MZP General Hqrs. President chuan Pathian in Zofate ram min pek Mizoram-ah hnamdang dan lova Mizoram-a lo lut Chakma foreigner te tan hmun a awm lo tih sawiin, "Mizoram chhungah Chakma ten dan lovin khua an din a, dan lovin an inbengbel a, a ram neitu Mizo zirlaite chanvo min lo chuhpui \hin hi Mizo \halai te hian na kan ti a. Tun a\ang chuan kan chanvo min chuhpui hi Mizo \halai te hian kan remti ngai tawh dawn lo a ni," a ti bawk.
MZP ten Zofate Chawlhbuk samfai hnatlang an neih ah hian Aizawl a\angin MZP member \hahnem tak an kal a. Aizawl a\anga kal te hi |hiak Sub-Hqrs, Thenzawl Sub-Hqrs. leh Tlabung Sub-Hqrs. MZP member \hahnem takin an \awiawm bawk a. MZP te hian Dan lova din Chakma khua te tlawhin an enfiah nghal dawn bawk a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 12/11/2017 - 11:18