Wednesday, 17th January, 2018

Mizoram UPC ten Missionary Day an hmang

Mizoram UPC te chuan nimin khan Mizoram hmun hrang hrangah Missionary Day an hmang a, Serchhip-ah chuan ruai nen he Ni hi hman a ni. UPC Mizoram Serchhip Hebron-a hruaitute sawi danin Mizoram-a Chanchin\ha famkim hril tura USA a\anga Missionary, Dover-i’n Mizoram a rawn thlen Ni hi UPC Mizoram chuan Missionary Day atan an hmang a, he Ni hi Mizoram hmun hrang hranga UPC (Mz) te chuan an remchan dan anga hmangin Hqrs. a\anga he Ni puala thuchah buatsaih pawh chhiarchhuah a ni. UPC (Mz) Serchhip Hebron chuan Missionary Day hi ruai nena hmangin nileng-a inkhawm an nei bakah zan lam thlengin hun an hmang a ni.
Roxie A.R.Telie Dover-i hi America (USA)-a Pentecostal Assemblies of the World Kohhran tirha India hmarlam Bhagalpur hmuna awm \hin a ni a, Zakamlova leh Apostolic Church General Bishop Blankenship te indawrna kal zelah Apostolic Church General Bishop Blan-kenship-a tirhin January 16, 1949 khan Aizawl-ah a rawn kal a, Dover-i hi Mizoram-a Isua Krista Pathian-na famkim leh Isua hminga Baptisma chan thu hril hmasa bertu ah pawmin Mizoram-a a rawn thlen Ni hi Missionary Day atan an hmang a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/17/2018 - 15:38

TCC pantu zingah Vaihlo bansan mi 44 zet awm

Kum kalta (2017) chhung khan Serchhip-a Tobacco Cessation Clinic chu Vaihlo leh a kaihhnawih nghei duh mi 261 zetin panin Vaihlo bansan mi 44 an awm. Tobacco Cessation Clinic (TCC) Serchhip-a thawk te hnen a\anga thu kan dawn danin nikum (2017) chhung khan Serchhip-a TCC hi mi 261 in panin he Clinic pantu zingah hian hmeichhia tam zawkin 141 zet an ni a, abak mi 120 mipa niin heng zinga mi 44 chuan an Vaihlo tih \hin te an sim a, hei hi Clinic pantu a\anga chhutin za zela 18.10% an ni a. Vaihlo leh a kaihhnawih simtu hi mipa 19 (17.59%) leh Hmeichhia 25 (18.51%) an ni. Heng Vaihlo leh a kaihhnawih nghei mi 44 bakah hian Vaihlo hman tlem phah pawh mi 194 zet an awm a, heng te hi Hmeichhia 108 (80%) leh mipa 86 (79.62%) an ni bawk.
Tobacco Cessation Clinic Serchhip-a thawk te hian nikum chhung khan Serchhip District chhunga zirna In hrang hrang 6-ah zuk leh hmuam leh vaihlo leh a kaihhnawih hrang hrang \hatloh zia inzirtirna buatsaihin Campaign an nei a, hetiang bawk hian Kohhran behchhan pawl, Kohhran |halai leh Senior Department inkhawm-ah te \um 18 zet zirtirna beihpui thlakin NGO leh tlawmngai pawl dang ah \um 6 zet Awareness Campaign hi an nei bawk a. Vaihlo leh a kaihhnawih chi hrang hrang khapna Dan bawhchhia a zuar leh hmang te dapchhuakin \um 64 zet Anti-Tobacco Squad Drive neih a ni bawk a, heng \um 64 fehchhuah ah hian dan bawhchhia mi 34 man niin heng mite hi pawisa chawitir \hin an ni bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/17/2018 - 15:37

Sawrkar hnuaia Department leh Institution Office building hrang hrang ah ‘Solar Rooftop System’ dah tum a ni

Nimin khan Chief Minister, Lal Thanhawla hovin sawrkar in a lo pawm tawh 'Solar Power Policy of  Mizoram 2017' hnuaia hmalakna leh hmachhawp la awm hrang hrangte thlirhona neih a ni a. He hmalakna hnuaiah hian Sawrkar hnuaia Department leh Institution hrang hrang Office building-ah ‘Solar Rooftop System’ dah tum a ni.
Chief Minister Office Conference Hall-a he \hutkhawm ah hian Chief Minister chuan ram changkang chho zelah kawlphetha mamawhna a sang chhoh zelin, a siamchhuah kawngah pawh leilung hausakna tiriral lo leh boruak tibawlhhlawh lo thei ang ber zawnga hmalak chu khawvelin a ngaihpawimawh em avangin India sawrkar pawhin hemi kawngah hian thui takin ruahmanna a siam thu a sawi a. Mizoramin heng kawlphetha thianghlima ngaih Nizung leh thli chakna hmanga siamchhuak tur hian vanneihthlak takin theihna (potential) \ha tak a neih thu fiah a nih tak zel thu Chief Minister hian sawiin, technology hmasawnna avangin Solar Energy siamchhuak tura senso pawh a hautak lo sawt hle a, Mizoram khua zawng zawng kawlphetha a thlunzawm vek tumna kawngah he hmalakna hi a pawimawh hle a ni, a ti a. Hemi kawnga hmachhawp awm te chu hlenchhuah vek a nih theih nan a mawhphurtute, a bik takin ZEDA leh P&E Department-te chu theihtawp chhuah tura a duh thu a sawi bawk. He Meeting-ah hian Zoram Energy Development Agency (ZEDA) Director, David Ramnunsanga chuan Solar Power Policy hnuaia hmalakna awm tawh leh kal mek chungchang sawifiahin, National Institute of Solar Energy, Ministry of New and Renewable Energy hnuaia survey in a tarlan danin, Ni sat ber laia Nizung chakna hmanga kawlphetha Mizoramin a siamchhuah theih zat chu 9.09 GWp (Giga Watt peak)/ 9090 MW a ni a, he Policy hnuaiah hian kum 2022 ralhmain a lo berah 80MW siamchhuah tum a ni. Hemi atana hmalakna pakhatah chuan Sorkar hnuaia Department leh Institution hrang hrang Office building-ah ‘Solar Rooftop System’ dah a ni a, hemi atan hian department tin ten anmahni sum \heuh an hman a \ul dawn a ni. Beisei anga Solar Energy Sysytem hi bun fel a nih theih chuan kum khatah kawlphetha Unit 5,890,224 siamchhuah tur a ni a, hei hian sorkar sum cheng nuai 212 chuang a hum thei dawn a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/17/2018 - 15:37

Monday, 15th January, 2018

Medical College neih theih nan hma la mek zel

Mizoram-a Medical College neih a nih ngei theih nan Health Department chuan chak takin hma a la mek tih Health Minister, Lal Thanzara’n a sawi. Health Minister chuan Falkawn-a State Referral Hospital chu Medical College – Mizoram Institute of Medical Education and Research (MIMER) dinna atan a tlin tâwk leh tâwk loh Medical Council of India (MCI) chuan a enfiah leh dawn tih a sawi a. MCI hian Mizoram sorkar chu February 2018 chhunga Medical College dinna tur atana State Referral Hospital chu an peih hman chuan endik turin an lokal leh tur thu an hrilh tih a sawi. Pawm a nih ngei theihna’n nasa takin tan lak a nih thu a sawi.
MCI hian \um engemaw zat an lo endik tawh \hin a, Nikum Nov. 21 leh 22 pawh khan State Referral Hospital hi an rawn endik a, an duhthusam ala nih loh avangin thla khat hnu a pawm theih tura an inbuatsaih theih chuan rawn endik leh an duh tih a sawi a ni. Mizoram sorkarin Medical College atana hna 667 lak a phal sak angin mamawh zual post 409 lak thuai tum a ni a, hna lak tur zingah hian Professor leh Asst. Professor turte pawh February thla chhunga lak fel tum a nih thu a sawi bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 01/15/2018 - 13:37

ZPM in Election Manifesto ziahna tawi an tlangzarh

Zoram Peoples Movement (|angrual Pawl) chuan Inrinni khan Aizawl Press Club-ah an Manifesto pawimawh lai tarlanna 'Leaflet' an tlangzarh. Manifesto tawi tlangzarh inkhawm hi Rev. C. Lianzuala chuan kaihruaiin an thil tlangzarh tak chu mipui lo hriat hmasak atana dah te a nih thu sawiin, hemi dungzui hian sawrkar pawh kaihhruai an tum niin a sawi a. Manifesto tlangzarhtu ZPM Chairman, Lalliansawta chuan |angrual pawl chuan an Manifesto te mipuiin awlsam zawka an hriat nan a point te te lachhuakin leaflet an siam tih a sawi a. "Sawrkar ngei tumin ZPM in hma kan la mek a, kalphung thar, mipui sawrkar din kan tum a ni," a ti bawk. Zawhna chhangin ZPM hruaitute chuan sawrkarna an siam chuan VIP Culture tihbo a, hautak lo thei ang bera kal an tum dawn niin an sawi bawk.
Inrinni-a tlangzarh tak ZPM leaflet a langsar zual te chu- Chief Minister in Major department enkawl lovin Minister te hnathawh a enpui ang, an sawrkar chhungin MLA te hlawh tihpun a ni lo anga, mi pakhatin sawrkar motor 1 aia tam kawl phal a ni lo anga, Bial mipui ten an dawr theihnan MLA te thla khatah ni 3 tal bial chhungah an awm thin ang. Kuthnathawk ten hralhna leh rate hresa in thlai an ching anga, kawngpui \ha neih nan theihtawp chhuah a ni anga, tuikhuah leh Ni zung hmangin kawlphetha a intodelh turin hmalak a ni anga, kan rama thlai, thei, thing leh mau sawngbawlna din a ni anga, khaw hrang hrangah Development Committee din a ni ang.  Thuneihna leh mawhphurhna semrual turin tualchhung rorelna hman a ni anga, tualchhung rorelna te Mizo khawtlang mila siam a ni ang. Elementary school enkawl turin Education Committee siam a ni anga, sawrkar bungrua leh zirlai uniform-ah te tualchhuak hman a ni ang. Entrepreneurship Development Bank dinin loan awlsam taka lak theihna tur siam a ni ang. Ruang phurh politics tihbo a ni anga, Zoram chhungah chuan khual-a ruang an khuaa phurh thlen chu sawrkar mawh a ni anga. Eizawnna him leh nghet neilo chhungkua te Bank account hawnsak a ni anga, damdawi In ah a thlawna enkawlna tur Health scheme rintlak siam a ni anga, BPL chhungkua thi an awmin sawrkar in Rs. 10,000/- in a ral anga, Tar leh hmeithai pension tihpun a ni ang. Val Upa Award siam a ni ang a, khaw tina nun zemawi leh entawntlak te hnenah hlan \hin a ni ang. Citizenship Act 1955 behchhanin Village Census neih a ni anga, foreigner te chu an chungah dan anga rel a ni anga. Assam nena ramri chingfel tura tanlak nghal a ni ang.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 01/15/2018 - 13:37

SAROA ten Assembly nei

Serchhip Auto Rickshaw Owners Association chuan Inrinni khan Assembly neiin an pawl hruaitu tur thlanna an nei. Serchhip District Park, Dawngzawl-a Serchhip Auto Rickshaw Owners Association Assembly hi an pawl President, RL. Chungnunga chuan kaihruaiin report ngaihthlak a nih hnuah kum kalta chhunga an member boral sunna hun hman a ni a, an pawl thu-thlung sawiin, intiam tharna an nei bawk. Hemi hnu hian kumin chhunga an pawl hruaitu tur thlanna neihin, President-ah RL. Chungnunga, Vice President-ah Lalsawimawia, Secretary-ah Malsawmtluanga, Asst. Secretary-ah Lalbiakmawia, Treasurer-ah C. Laltluang-kima leh Fin. Secretary-ah B. Lalzamliana te thlan an ni a. Rorelna an neih ah thu ngaihtuah tur 5 chhawp chhuah zingah Driver te chhawr dan mumal taka siamin Motor neitu in kar khatah Rs. 1500/- in chhawr \hin se an ti a, Auto Rickshaw rate hman mek pawh ennawn leh nise an ti bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 01/15/2018 - 13:36

Myanmar sipate beihpuithlak avanga Mizoram-a raltlan te awlsam zawka enkawl nan khaw 2-ah sawikhawm tum an ni

Myanmar sipaite’n an khaw bul ngaw kara Arakan Army helho laka beihpui an thlak avanga India ramchhung Lawngtlai District khaw pali-a rawn raltlan mi 1,440 te chu awlsam zawka enkawl an nih theih nan khaw pahniha sawikhawm tura hmalak a ni.
Lawngtlai District thuneitute hnen a\anga thudawn danin Myanmar -a Paletwa leh a chhehvel khua a\anga Lawngtlai District khaw pali – Laitlang, Hmawngbuchhuah, Zochachhuah leh Dumzautlang-a rawn raltlante hi an khua \heuha kir leh tura tih an ni chungin an la kir duh lova. |henkhat chuan kir leh lova Mizoram-a awmhlen an chak a, In sak tumte pawh an awm nia thudawn a ni. Hetiang a nih avang hian an vaia an kir leh ngeina tur leh enkawl awlsam zawkna’n thuneitute chuan khaw pahniha Relief Camp-ah dahkhawm nise tih an rel a. Krismas hma lawk khan Myanmar lam a\anga silaimu leng in Laitlang khua a denfuh avangin khaw pali-a awm \hinte chu khaw pathumah an awm tawh a ni. Official-te hnen a\anga thudawn danin raltlan zinga mi \henkhat, In leh lo din tumte chu thuneitute’n khapin Relief Camp lamah an dahlut leh hlawm a. Myanmar sipaite’n an khua a kir leh a him tawh nia an sawi hnuah pawh la him tawk rih lova inngaiin an kir duh rih lo tiin \an an khawh hlawm a ni. Hetihlai hian Chief Minister, Lal Thanhawla chuan heng Zohnahthlak raltlante \anpuina hi sorkar laipui-ah an dilpui niin a sawi a. An rama ralmuang taka an kir leh theihna atan sorkar chuan theihtawp a chhuah mek tih sawiin, an khua \heuh a an kir leh theihna atan a hmuna awmchilh Assam Rifles te’n theihtawp an chhuah mek niin a sawi bawk a ni. An rawn raltlanna khuate hi khaw chengker leh tlawhpawh harsa tak a nih avangin sawrkar tan pawh an ei leh in tur leh mamawh dang pek a harsa hle tih a sawi bawk. Thudawnna pakhat chuan raltlan hi mi 1,440 an awm mek niin a sawi a, an zinga 998 te chu puitling an ni a, 442 te chu naupang an ni. Raltlante hi Myanmar sipaite’n Arakan Army hel pawl laka beihpui an thlak avanga nikum Nov. 25 a\ang khan nunau ho hi Lawngtlai District-ah himna zawngin an rawn lut a. Myanmar sipaite hian helho tawmna hmun beihna atan Helicopter te an hmang a, an bomb \hin nia sawi a ni. Arakan Army hel pawl hi Rakhine State zalenna atana sualtute an ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Mon, 01/15/2018 - 13:35

Friday, 12th January, 2018

Mizoram-a Chanchintha thlen Ni, Missionary Day BCM ten urhsun takin an hmang

Nimin January 11, 2018 kha Mizoram-a Chanchin\ha thlen Ni, Missionary Day vawi 124-na a ni a, Baptist Church of Mizoram chuan he Ni hi urhsun takin an hmang a ni. Chanchin \ha hril tura Mizoram-a Missionary hmasa ber lo thlen champha phak, “Missionary Day” hi Mizoram Sawrkar chuan Sorkar chawlh (State Holiday)-ah puangin sawrkar Pisa leh Zirna In te khar a ni a, Baptist Church of Mizoram (BCM) chuan he Ni hi nilengin urhsun takin an hmang a, inkhawm leh Inpawlhona leh zaikhawm-in hun an hmang a ni. BCM hian kumin Missionary Day thupui atan “I puan In hmun chu zauh rawh” (Isaia 54:2) tih an hmang a, Chawhma lamah inkhawm, chawhnu lamah Inpawlhona leh zan lam Inkhawm te neiin BCM Hqrs. a\anga thupui thlansa an neih hmangin thuchah ngaihthlak a ni bawk a. Chawhma inkhawmah thawhlawm lakhawmin hei hi Mizoram Gospel Centenary 125-na, Quasquicentenial atan hman tur a ni bawk.
Serchhip-a Baptist Church of Mizoram (BCM) Kohhran hrang hrang te chuan he Ni hi urhsun takin an hmang a, Kohhran hrang hrangte hian chawhma lamah inkhawm neiin chawhnu lam ah Pathian faka zaikhawmna hun an hman bakah tlai lamah ruai an \heh a, zan lamah inkhawm an nei bawk. January 11, 1894 khan Mizoram-a Missionary hmasa ber, Sap Upa leh Pu Buanga-te chuan Sairang an lo thleng a, he Ni hi Mizoram-a Chanchin\ha thlenna Ni, Missionary Day-ah hman niin kum 1994 khan Mizoram-a chanchin\ha thlen Ni kum 100 tlinna pawh lawm a ni tawh nghe nghe a ni. Hetihlai hian Mizoram-a Kohhran lian ber, Presbyterian Church of India chuan kum 1973 Synod inkhâwmpui chuan Rev. William Williams chu Mizoram-a Chanchin \ha hriltu hmasa berah a lo pawm tawh tih sawiin, kum 2009 Synod inkhâwmpui chuan Rev. William Williams-a hi Missionary-te zînga Mizoram leilung rap hmasa berah a lo pawm leh bawk tih an sawi a. Ani hi Mizoram leilung rap hmasa bertu chauh ni lovin, Missionary-te zînga Mizo-te hnêna Chanchin \ha hril hmasa ber a nih bawk avangin kum 2012 Synod inkhâwmpui chuan a lo thlen ni March ni 15 chu Chanchin \ha thlen ni atân pawmin March 15 hi Missionary Day atan an hmang dawn thung a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 01/12/2018 - 13:26

Chhiahtlang-ah hnathawk lai lungphuchawl in boral

Chhiahtlang Hmar Veng-a cheng Zoramliana (70) chu nimin khan an In bula a hnathawhna ah thi-a hmuh a ni a, lungphuchawl-a boral nia rin a ni. Thudawn danin Zoramliana hian an kawm-thlang-a Zakamlova huan-a thing chu Vawk In chhuat atana hman turin kih a dil a, he thing kung hi ft. 1 hawlhtlang vela lian niin kawng a\anga meter 50 vela awm a ni a, thing kit tura a thawm hi a chhak lawka Vawkchaw chhuma awm, H. Vanlalsiama chuan hriain, a thing kih tum hi a tluk tak mai loh avang leh a thawm a reh rei tak avangin H. Vanlalsiama hian a ko a, engmah thawm a neih zui loh avangin a hmunah kala a zuk en chuan a thing kih tum bulah hian rem taka lo mu in a lo boral tawh a, a bulhnaia awm te punin a ruang hi lain nizan khan lumen a nih hnuah Vawiin hian vuiliam a ni ang.
Zoramthanga hi Sipai bang niin nimina a ruang hmutu hmasa te hian a taksa velah hliam emaw engmah a awmloh thu an sawi a, a thing kih tum pawh hi hreipui hmangin alo chek nual tawh a, a hnathawhna ah hian lungphuchawl in a boral nia ngaih a ni. Zoramthanga hian a nupui leh a fate, mipa 1 leh hmeichhia 6 a kalsan a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 01/12/2018 - 13:26

Kum 2017 chhungin Serchhip District-ah thubuai ziahluh 234 zet a awm

Kum kalta (2017) chhung khan Serchhip District chhunga Police Station hrang hrangah thubuai ziahluh 234 a awm a, heng zinga thubuai 205-ah chuan Chargesheet thehluh ni tawhin mi 142 te chu thiamloh chantir an ni tawh a. Thubuai chhui lai mek 62 a awm bawk.
Serchhip SP Office a\anga thu kan dawn danin Serchhip District chhunga Police Station hrang hrang- Serchhip, Thenzawl leh North Vanlaiphai Police Station-ah te nikum chhung khan thubuai 234 ziahluh niin heng zinga 205 te chu chhui zovin chargesheet thehluh a ni tawh a, thubuai chhuichhuah mai theihloh avanga Final Report siam panga (5) awmin a, thubuai chhui lai tih khawtlai rih (Pending Investigation) 24 a awm bawk a, thubuai hrang hrangah hian thiamloh chantir mi 142 an awm tawh a, thubuai ngaihtuah lai 62 a awm bawk a ni. Nikum chhunga Serchhip District-a Police ten thubuai an ziahluh 234 zinga 66 hi IPC hnuaia ziahluh niin 168 hi Non-IPC hnuaia ziahluh a ni a, IPC hnuaia thubuai ziahluh zingah hian thubuai 47-ah Chargesheet thehluh ni tawhin Final Report siam 4 a awm a, Pending Investigation 15 awmin thiamloh chantir mi 7 leh thubuai ngaihtuah lai 39 an awm bawk a. IPC hnuaia thubuai ziahluh zingah hian rukruk kaihhnawih (Theft & Burglary) tam berin thubuai 38 zet ziahluh a ni a, tualthah thubuai leh tualthah tum thubuai pahnih ve ve ziahluh a awm bawk a, pawngsual leh mi rukbo thubuai pawh pakhat ve ve ziahluh awmin thubuai dang 2/1 lek lek ziahluh chi hrang hrang a awm bawk a ni. Nikum chhunga Non-IPC hnuaia thubuai ziahluh 168 awmah thubuai 158-ah Chargesheet thehluh a ni tawh bawk a, Final Report siam pakhat awmin Pending Investivation 9 a awm a, mi 135 te thiamloh chantir awm tawhin thubuai 23 ngaihtuah lai a awm bawk. Non-IPC hnuaia thubuai ziahluh zingah hian MLPC Act hnuaia thubuai ziahluh a tam fal hle a, thubuai ziahluh 141 zet awmin heng te hi thubuai chinfel vek a ni tawh bawk a, Ruihhlo leh damdawi kaih-hawih te thubuai siamna, ND&PS Act hnuaiah thubuai ziahluh 16 a awm bawk a, hursualna laka naupangte humhalh leh venhimna dan POCSO Act hnuaiah thubuai ziahluh 10 awmin 8 chu chinfel a ni tawh bawk a, Juvenile Justice Act (JJ Act) hnuaia thubuai ziahluh 1 a awm bawk a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 01/12/2018 - 13:25