Friday, 9th February, 2018

Serchhip Town chhunga YMA Branch hrang hrang ten faina kawnga inelna an nei dawn

Urban Development & Poverty Alleviation Department leh Serchhip Sub-Hqrs. YMA te \angkawp hmalakna in Serchhip Town chhunga YMA Branch hrang hrangte faina kawnga inelna chu neih tur atan inbuatsaihna kalpui mek a ni. India rampuma Faina kawnga hmalakna, Swachh Bharat Mission (SBM) hnuaia Serchhip khawpui chhunga YMA Branch te tana faina kawnga inelna neih tur hi Serchhip Sub-Hqrs. YMA Executive Committee (SEC) Meeting in an pawm hnuah nimin khan he inelna tur chungchang sawihona hi District Urban Development Officer (DUDO), Vanthangpuii hovin a Office-ah neih a ni a. He hunah hian Serchhip Sub-Hqrs. YMA hruaitute leh Town chhunga YMA Branch hrang hrang hruaitute telin DUDO, Vanthangpuii chuan Serchhip khawpuiin faina leh thianghlimna kawngah hma a sawn theihna tur atana hmalakna leh ruahmanna hrang hrang te sawiin, khawpui chhung Branch YMA hrang hrang aiawhte chu faina leh thianghlimna kawngah theihtawp chhuah turin a sawm a. Serchhip Sub-Hqrs. YMA President, R. Sanghmingthanga pawhin faina leh thianghlimna kawnga \an la chho zel tura fuihna thu a sawi bawk.
Ruahman lawk ang chuan Faina kawnga inelna ah hian Serchhip khawpui chhunga YMA Branch 21 te an tel anga, tun February thla a\anga May thla chhung hian thla tin enfiah hna thawh a ni anga, Faina kawnga inelna enfiahna ah hian Faina hnatlang neih dan te, Faina leh thianghlimna kawnga inzirtirna an neih dan (Public Awareness/Mas Media Campaign) chungchang ah te, Ran khuahkhirh danah te, Vantlang hmunhma an enkawl danah te leh Bawlhlawh an paih danah te endikna neih a ni anga, heng inelna a ti\ha ber Branch te chuan lawmman ah Rs. 20,000/-, pahnihna in Rs. 15,000/- leh pathumna in Rs. 10,000/- an dawng anga, a dang zawng hian Consolation Prize Rs. 2000/- \heuh an dawng bawk ang. He khawpui faina leh thianghlimna kawnga intihsiaknaa endik tur hian Serchhip Sub-Hqrs. YMA chuan ‘Search Committee’ dinin he Committee-ah hian Chairman bakah Member mi pathum an awm a, anni hian thlatin Veng tin tlawhchhuakin an report chu DUDO hnenah hian an thehlut zel anga, a ti\hate te chu District Urban Development Officer Office-a thawktute nen enho lehin lawmman dawng turte hi thlanchhuah an ni dawn a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 02/09/2018 - 10:14

MNF Hqrs. dah apiang pawm

 MNF Serchhip East Block leh West Block Joint Meeting neih tawhin a lo pass tawh angin nimin a Thenzawl-a MNF \halai kalkhawm te chuan "Serchhip constituency-a MLA candidate tur chu Headquarter-in an rawn dah ang apiang lungrual takin kan pawm a, MNF MLA candidate Serchhip constituency-a ding apiang a tlin ngei theih nan theihtawpin hma kan la ang," tiin Resolution siamin an pass a ni. Kumin hian MLA inthlanpui neih tur niin Candidate tur inrinsiak mek a ni a, MNF a\ang hian tunhma lama ding tawh C. Lalramzauva leh Vanlaltluanga te hming chu lamrik zingah a langsar hle a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 02/09/2018 - 10:13

Sangha chi tharchhuah tam theih dan tur zirhona nei

Serchhip-a Fisheries Department chuan Sangha chi-a intodelh beihpui thlak kalzelah nimin khan Sangha chi thar chhuah dan tur inzirtirna hun an buatsaih. He zirhona Serchhip I&PR Conference Hall-a neih ah hian Fisheries Department-a Fisheries Extension Officer, B. Vanlalnela chuan Sangha vulh chu eizawnnna tlak anih thu leh Sangha chi-ah kuthnathawktute kan intodelh a, eizawnna ngel nghet kan neih theih nan Department-in theihtawp a chhuah zel thu a sawi a. Dil-a Sangha khawi chi Common Carp (Sangha sen) te inthlahchhawn hunlai anih avangin Department Technical mite leh Farmers ten Sangha sen (Common Carp) a kan intodelh theih dan tur leh hmalak dan tur te sawiho tura he hun hi buatsaih anih thu a sawi bawk.
He zirhona hunah hian Serchhip District chhung khaw hrang hranga sangha dil nei, a chi siam chhuak mai thei tura beiseite an tel a. Fisheries mithiam ten a lem nen entirin zirtirna an pe a. He hun hman zawh hian Sangha dil-ah kalin hmalak dan tur inkawhhmuhna leh inhrilhhriatna hun an hmang chhunzawm a. Sangha chi a intodelh mai pawh nilo, a mamawhte hnena hralhchhuak thei tura \an lak an tum thu leh an hun hman chu hlawk thlak an tih thu an sawi a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 02/09/2018 - 10:13

Inthlanpui kan hmachhawn turah hian MNF chu thawhpui nei lovin kan kal dawn - Zoramthanga

MNF President, Zoramthanga chuan inthlanpui kan hmachhawn turah MNF chu thawhpui nei lovin an kal dawn tih a sawi a. MNF an sawrkar chuan SEDP hmangin kan ram leilung hausakna haichhuakin mipuite chu eizawnna ngialnghet leh rethei tawh lo tura siam an tum thu a sawi bawk.
MNF Hrangturzo West leh East Block ten nimin-a North Vanlaiphai Community Hall-a Joint Conference an neih a hmanpuina ah he thu hi sawiin MNF President, Zoramthanga chuan tunhma in thawhpui ZNP leh MPC-te pawh an lo nei tawh \hin tih sawiin, thawhpui neih hi a fuh ngai lo tih an hre tawh tih a sawi a. A fuh teuh ber chu kum 1998 khan MPC nen an thawkho a, MLA 34 lai neiin mahse sawrkar chu kum khat bak a kallo tih a sawi a. Mi \henkhat ten BJP nen inzawmna nei ang dawn dawnin an sawi \hin tih sawiin, “BJP nen ngat phei chuan inzawmna pakhat mah kan neilo lehzual a, kan thuthlungah chhim leh hmar ang kan ni e. Congress ni lo zawng zawng, Congress sawrkar duhlo intelkhawm NEDA leh NDA-ah kum 2014 MP inthlan dawnah kan tel ve a. MPC leh ZNP pawh an tel ve tho,” a ti a. MNF President chuan ZPM chungchang sawiin, “ZPM hian innghahna tur Unit bulfuk an nei lo a, an zinga nei awmchhun ZNP leh MPC lahin an nei mumal tawh hek lo a. Thawkho anga lang si hi pakhatah lungrualin an inhlawmkhawm thei lo a, hotu berah an buai nghal pang a, an kal kal hian lokal ve se, MNF tan engto leh hlauh tur a chhete mah a awm lo,” a ti a. Congress chu Central-ah an tla fai vek tawh tih pawh sawiin, “State inthlan a piangah an tla zel a, a zik la awmchhun Mizoram Congress sawrkar hi kumtawp lam Election-ah a zik kan fik hmawk anga, MLA 10 pawh a tam berah an neih ka ring tawh lo. Kumtawp ah chuan India ramah Punjab State-ah chiah an sawrkar tawh ka ring. Pathian leh mipui zarah MNF kan sawrkar ngei ngei ang tih lo ring rawh u,” a ti bawk. MNF President, Zoramthanga chuan Pathian leh mupui zara MNF an sorkar chuan SEDP hmangin kan ram leilung hausakna hai chhuakin chhungtin in kumtin cheng nuai 5/7/10/15-te lakluh theihna turin an ruahman tih a sawi a. “Ei leh bara Zoram mipui intodelh tir hi kan tum ber pakhat a ni a, 'Mipuite hi eizawnna ngial-nghet leh rethei tawhlo tura siam kan tum. Chumi atan chuan hnathawh nan chhungkaw khat tan cheng nuai 3 aia tlem lovin kan \anpui ang che u. Kan hun hmasa kha Central-ah Congress sawrkar lai a ni a, chuti chung chuan sum tam tak sawi chhuakin New Capital-ah khawpui thar kan din a, PMGSY, Bamboo Link Road leh thil dang hmangin Zoram hmun hrang hrangah kawngpui kan lai thlur seng sung a, Ch.Chhunga Bus Terminal te, Ch. Saprawnga Truck Terminal te, Bawngkawn to Durtlang kawng te, Millenium Centre te leh thildang tam tak sawi mai sen loh kan ti a. Tunah chuan Central-ah Congress a sawrkar tawh lo lehnghal a, Mizoram mipui mamawh ang chu duh thalin kan sawi chhuak thei anga, kan SEDP-ah hian sum lamah harsatna a awm lovang,” a ti bawk. Nimin a MNF Hrangturzo West & East Block Joint Conference hian Resolution pass in MNF President, Zoramthanga kaihruaina chu an rintawk thu leh a kaihhruaina hnuaiah Zoram pumah leh Hrangturzo Constituency chhunga khawtinah MNF-in kumin inthlanah hian hnehna an chan ngei an ring thu bakah hemi atan hian theihtawp an chhuah zel dawn thu an tarlang a. Kohhran leh tlawmngai pawl duh loh Congress sawrkarin Zu a zuar lui chu na taka an dem thu leh Zu zawrh avanga Police leh Civil mi engemaw zat an boral chu pawi an tih thu tarlangin, hei vang hian sawrkar chu paihthlak ngei an tum thu bakah Zoram pumah leh a bik takin Hrang-turzo constituency, Tuichangral inkalpawhna kawng hrang hrangte a chhe em em vek chu na an tih thu leh siam\ha thuai tura sawrkar an phut thu te pawh an tarlang a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Fri, 02/09/2018 - 10:12

Thursday, 8th February, 2018

Ruang chhar vuiliam a ni

Niminpiah tlai khan Aizawl dai, Maumual-a Thlam pakhat ah hmeichhe ruang pakhat chhar a ni a, he ruang hi enfiah a nih hnuah Zothanmawii (Tetei), Serchhip Chanmari Veng ami ruang a ni tih finfiah a ni. Thudawn danin Zothanmawii (Tetei), Serchhip Chanmari Veng-a F. Lianchhunga fanu hi pasal neiin Aizawl lamah hian a awm mek a, tunkar Thawh\anni zan khan a pasal nen hian mi huan Thlam-ah riah dilin an riak a, Thlam-a lo awm hian a tuk-ah hnathawka chhuahsanin a kir leh chuan a ruang hi a hmu a, a pasal hi chu a lo awm tawhlo nia sawi niin Police te chu hriattir nghal an ni a. A ruang hmuhna ah hian Bawngkawn Police te chu kal nghalin an chhui zuina ah Zothan-mawii (Tetei) hi a ni tih finfiah a ni zui ta a ni.
Zothanmawii ruang hi hemi zan hian damdawi In-ah dah phawt niin nimin khan Postmortem nghal a ni a, chawhnu lam khan Serchhip rawn panpui nghal a niin nizan thimhlim khan Ser-chhip Chanmari Veng-a an In thlenpui a ni a, nizan vek khan vuiliam nghal niin a thihna chung-chang pawh hi chhui zui nghal a ni bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Thu, 02/08/2018 - 10:27

Road Safety Week hmang dawn

Serchhip District Road Safety Committee chu nimin khan Addl. DC, Chuauhnuna hovin a Office Chamber-ah an \hukhawm a, tun thla ni 12-16 chhunga Road Safety Week hman dan tur an sawiho. He Meeting hian Road Safety Week hawnna inkhawm chu Feb. 12, 2017 dar 10:30 Am ah DC Conference Hall-ah neih nise an ti a, Week chhung hian Serchhip a lirthei zawng zawng endik hna thawh relin, Serchhip-a Passenger phur \hin lirthei khalhtute zawng zawng Week chhung hian Training pek vek nise an tih bakah, Passenger phur lirthei ( Maxi Cab, Taxi leh Auto Rickshaw) khaltu \ha ber thlanchhuah nise an ti bawk. He \hutkhawm ah hian Addl. DC chuan lirthei khalhtuten fimkhur tak leh dan zawm chunga lirthei kan enkawl a pawimawh thu sawiin, he Hapta hi hlawk taka hman a \ul thu a sawi bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Thu, 02/08/2018 - 10:27

Health Care Scheme leh RSBY kalpui tur chungchang zirhona Serchhip-ah neih a ni

Kum 2018-2019 chhunga Mizoram State Health Care Scheme leh Rashtriya Swasthya Bima Yojana (RSBY) kalpui tur chungchang zirhona chu nimin khan Serchhip District chhunga Health Department-a thawktute tan buatsaih a ni. Serchhip CMO Conference Hall-a Mizoram State Health Care Scheme leh Rashtriya Swasthya Bima Yojana (RSBY) chungchang zirhona hun hi Serchhip Chief Medical Officer, Dr. Laldawngliana Sailo chuan kaihruaiin RSBY atana thlalak kalpui \hin ah Serchhip District chu a ti\ha pawl kan nih \hin thu sawiin, kumin ah pawh \ha taka an kalpui leh theih a beisei thu a sawi a. Chumi atan chuan he training hi hlawk taka an hman a beisei thu a sawi bawk.
He hunah hian Mizoram State Health Care Society-a Chief Executive Officer, Dr. Biakthansangi chu Resource Person atana hman niin kum kaltawh a\angin RSBY atan Survey neih \hin a lo nih tawh thu leh amaherawh chu kumin ah Survey hi neih leh a \ul dawn thu a sawi a. He Survey neih turah hian Health Worker ten hun bituk awm te an ngaih pawimawh a \ul thu sawiin, kan damloh nikhua ah sawrkar chu a \hat thu leh sawrkar hnathawk ve lo tan pawh kawng a awlsam tak zel thu sawiin, hei vang hian mipuite pawhin RSBY leh Health Care Scheme pawimawhna te hriain an uar zel a, thawktute pawh an fimkhur zual deuh deuh a pawimawh thu a sawi bawk. Dr. Biakthansangi chuan RSBY hnuaiah hian Economic & Statistic department in a siam BPL List chu hman a nih thu sawiin, kumin hian RSBY atan hian a thara thla lak a \ul thu leh chhungkaw pakhat ah mi 5 zelin thla an lak tur thu a sawi a, chhungkua ah mi 5 aia an tam chuan chhungkua chu \hensawm theih an nih thu leh Smart Card man pawh pakhat ah Rs. 30/- niin an chhungkua \hensawm dan a zira a pun zel tur thu a sawi a. Kumin ah hian kum 60 chin chunglam, Senior Citizen tan ruahmanna thar siamin Rs. 30,000/- hman belh theih a nih dawn thu a sawi bawk. Health Care Scheme chungchangah kumin hian Renew awm lovin a thara inziahluh vek a \l dawn tih sawiin, kumin February a\anga May thla chhunga inziahluh theih a nih dawn thu a sawi a. Health Care Scheme hnuaiah hian chhungkaw pakhat ah mi 5 zel ziahluh theih a nih rualin ziahbelh theih a nih thu leh ziahbelh ah hian sum chawibelh zel erawh a \ul thu a sawi a. Rs. 1,00,000/- thleng bill duh tan Rs. 500/-; Rs. 2,00,000/- tleng bill duh tan Rs. 750/- leh Rs. 3,00,000/- thleng bill duh tan Rs. 1000/- a inziahluh theih a nih thu a sawi a. Hei bakah hian Hepatitis C vei te tan Health Care Scheme hnuaiah a thlawna inenkawlna pek theih a nih thu a sawi bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Thu, 02/08/2018 - 10:26

Mizoram Victims of Crime Compensation Scheme hnuaiah cheng nuai 145 chuang semchhuah a ni tawh

Serchhip-ah cheng nuai 19 chuang sem a ni tawhMizoram State Legal Services Authority (MSLSA) chuan kum 2017 chhungin dan bawhchhiatna avanga tuartu (victim) mi 53 hnenah danin a phut sum-a \anpuina, Crime Victim Compensation cheng nuai 145.85 a pe chhuak a. Serchhip District-ah pawh kum 2015 a\angin mi 10 hnenah zangnadawmna hi pekchhuah a ni tawh.
Mizoram State Legal Services Authority (MSLSA)-a thawktute sawi danin Mizoram Victims of Crime Compensation Scheme hnuaiah vanduaina tawk te hi \anpuina pawisa pek \hin an ni a, nikum chhung khan mi 53 hnenah Rs. 145,85,000 a pechhuak a, hei hian Mizoram District zawng zawng a huam a ni. Compensation diltute hi dilsaktu awmin a \hen chu naupang an ni a, dan bawhchhiatna hrang hrang avanga tuartute an ni a, case te hi tualthahna - 13, pawngsual- 12, inthah tumna- 2 leh POCSO Act (naupang humhimtu dan) hnuaiah 26 te a ni. Serchhip District-ah chuan nikum chhung khan pawikhawihna/sualna avanga vanduaina tawktu mi 5 hnenah zangnadawmna Rs. 14,00,000. (Nuai 14) pekchhuah a ni. Serchhip District chhungah chuan The Mizoram Victims of Crime Compensation Scheme 2011 hnuaiah hian kum 2015 a\angin mi 10 hnenah zangnadawmna hi pek tawh niin a vaiin sum pekchhuah tawh zawng zawng chu Rs. 19,20,000/- a ni a. Kum 2015 khan mi 2 hnenah Rs. 2,20,000/- pekchhuah niin kum 2016-ah mi pathum hnenah Rs. 3,00,000 pekchhuah niin nikum, 2017 khan mi panga hnenah Rs. 14,00,000 pekchhuah a ni a. Tunah hian \anpuina dilna lut tawh, la ngaihtuah tur engemaw zat awmin hemi ngaihtuah tur hian Committee pawh an \hutkhawm thuai rin niin zangnadawmna hi vanduaina an tawh dan a zirin pekchhuah zat a inanglo a, naupang kum 14 hnuailam phei chu tam zawk pek theih a ni bawk. The Mizoram Victims of Crime Compensation Scheme hnuaia \anpuina pek tur hi District tinah dil a ni \hin a, hei hi District Legal Services Authority member-ten lo zirchiangin anni hian pek tur a nih leh nih loh te, pek tur an nih chuan cheng engzat nge pek an nih ang tih thlengin thutlukna an lo siam \hin a. District bika member te hi DC, Police aiawh, YMA aiawh leh MHIP aiawhte an ni a, District hian MSLSA Office Aizawl-ah thehlutin MSLSA hian Finance ah an dil lehin a hnuah sanction order siam a ni a, District tinah an thawn kir lehin sem-chhuah a ni \hin a ni. 'Mizoram Victims of Crime Compensation Scheme 2011' in ruahmanna a siam angin BPL chhungkuaa mi misual kuta thite leh pawng-sual tuartute chu zangnadawmna pek theih an ni a, a a tuartu (victim) ten vanduaina an tawh dan azirin Rs. 5,000/- a\anga Rs. 1,00,000/- thleng zangnadawmna (compensation) hi pek theih a ni. MSLSA hotute a\anga thudawn danin Crime Victim Compensation hi an chhungte emaw, anmahni enkawltuten an dilsak tlangpui a, hnu-chham In-a awm an nih thung chuan an awmna Home hotuten an dilsak \hin. Tunah hian dilna thehlut tawh leh ngaihtuah fel tawh, pekchhuah mai theih tur mi 13 an awm a, hemi senso atan hian cheng nuai 38.45 sen a ni dawn niin MSLSA hotute chuan an sawi bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Thu, 02/08/2018 - 10:26

Wednesday, 17th January, 2018

Mizoram UPC ten Missionary Day an hmang

Mizoram UPC te chuan nimin khan Mizoram hmun hrang hrangah Missionary Day an hmang a, Serchhip-ah chuan ruai nen he Ni hi hman a ni. UPC Mizoram Serchhip Hebron-a hruaitute sawi danin Mizoram-a Chanchin\ha famkim hril tura USA a\anga Missionary, Dover-i’n Mizoram a rawn thlen Ni hi UPC Mizoram chuan Missionary Day atan an hmang a, he Ni hi Mizoram hmun hrang hranga UPC (Mz) te chuan an remchan dan anga hmangin Hqrs. a\anga he Ni puala thuchah buatsaih pawh chhiarchhuah a ni. UPC (Mz) Serchhip Hebron chuan Missionary Day hi ruai nena hmangin nileng-a inkhawm an nei bakah zan lam thlengin hun an hmang a ni.
Roxie A.R.Telie Dover-i hi America (USA)-a Pentecostal Assemblies of the World Kohhran tirha India hmarlam Bhagalpur hmuna awm \hin a ni a, Zakamlova leh Apostolic Church General Bishop Blankenship te indawrna kal zelah Apostolic Church General Bishop Blan-kenship-a tirhin January 16, 1949 khan Aizawl-ah a rawn kal a, Dover-i hi Mizoram-a Isua Krista Pathian-na famkim leh Isua hminga Baptisma chan thu hril hmasa bertu ah pawmin Mizoram-a a rawn thlen Ni hi Missionary Day atan an hmang a ni.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/17/2018 - 15:38

TCC pantu zingah Vaihlo bansan mi 44 zet awm

Kum kalta (2017) chhung khan Serchhip-a Tobacco Cessation Clinic chu Vaihlo leh a kaihhnawih nghei duh mi 261 zetin panin Vaihlo bansan mi 44 an awm. Tobacco Cessation Clinic (TCC) Serchhip-a thawk te hnen a\anga thu kan dawn danin nikum (2017) chhung khan Serchhip-a TCC hi mi 261 in panin he Clinic pantu zingah hian hmeichhia tam zawkin 141 zet an ni a, abak mi 120 mipa niin heng zinga mi 44 chuan an Vaihlo tih \hin te an sim a, hei hi Clinic pantu a\anga chhutin za zela 18.10% an ni a. Vaihlo leh a kaihhnawih simtu hi mipa 19 (17.59%) leh Hmeichhia 25 (18.51%) an ni. Heng Vaihlo leh a kaihhnawih nghei mi 44 bakah hian Vaihlo hman tlem phah pawh mi 194 zet an awm a, heng te hi Hmeichhia 108 (80%) leh mipa 86 (79.62%) an ni bawk.
Tobacco Cessation Clinic Serchhip-a thawk te hian nikum chhung khan Serchhip District chhunga zirna In hrang hrang 6-ah zuk leh hmuam leh vaihlo leh a kaihhnawih hrang hrang \hatloh zia inzirtirna buatsaihin Campaign an nei a, hetiang bawk hian Kohhran behchhan pawl, Kohhran |halai leh Senior Department inkhawm-ah te \um 18 zet zirtirna beihpui thlakin NGO leh tlawmngai pawl dang ah \um 6 zet Awareness Campaign hi an nei bawk a. Vaihlo leh a kaihhnawih chi hrang hrang khapna Dan bawhchhia a zuar leh hmang te dapchhuakin \um 64 zet Anti-Tobacco Squad Drive neih a ni bawk a, heng \um 64 fehchhuah ah hian dan bawhchhia mi 34 man niin heng mite hi pawisa chawitir \hin an ni bawk.
- Published by Lenkawl, the first independent daily newspaper in Serchhip, since 1981.
Zonuna Kawlni
Wed, 01/17/2018 - 15:37